Астана
11°C
Астана
11°C
Астанада мамандандырылған ауданаралық әкімшілік құқық бұзушылықтар жөніндегі сот блогер Ерболат Жанабыловқа қатысты әкімшілік істі қарады. Іс оның жұбайы Эльмира Төлегеновамен болған отбасылық жанжалға байланысты қозғалған. Сотта тараптар татуласқан, деп хабарлайды Paryz.kz.
Іс материалдарына сәйкес, оқиға 2026 жылғы 30 қыркүйекте болған. Үйде Жанабылов жанжал шығарып, жұбайының қолынан ұстаған. Оның әрекеті Құқық бұзушылық туралы кодекстің 73-бабының 1-бөлігі бойынша отбасылық-тұрмыстық қатынастар саласындағы құқық бұзушылық ретінде сараланған. Оқиға әлеуметтік желілерде тараған бейнежазбамен де расталған.
1 қазанда өткен жабық сот отырысында блогер кінәсін толық мойындап, өкінетінін айтты. Сондай-ақ жұбайымен татуласуға ниетті екенін білдіріп, сотқа татуласу туралы жазбаша келісім ұсынған.
Эльмира Төлегенова сотта ұрып-соғу болмағанын, ерлі-зайыптылар арасында сөзге келіспеушілік болғанын айтты. Ол татуласу туралы келісімге ешқандай қысымсыз, өз еркімен қол қойғанын растады.
Сот Жанабыловтың құқық бұзушылықты алғаш рет жасағанын, бұрын әкімшілік жауапкершілікке тартылмағанын, кінәсін мойындап, өкінгенін ескерді. Жауапкершілікті ауырлататын мән-жайлар анықталмаған.
ҚР ӘҚБтК-нің 64-бабына сәйкес, сот тараптардың татуласуына байланысты әкімшілік іс бойынша іс жүргізуді тоқтатты. Сот қаулысы әзірге заңды күшіне енген жоқ.
