Астана
16°C
Астана
16°C
Танымал тележүргізуші әрі журналист Дина Төлепберген ата-аналарға үндеу жасап, 14 жасқа дейінгі балаларға қымбат смартфон алып бермеуге шақырды. Оның пікірінше, шексіз интернет пен бақылаусыз контент баланың дамуына кері әсер етуі мүмкін.
Журналист әлеуметтік желідегі видеоүндеуінде ұлдарының қарапайым батырмалы телефон қолданатынын көрсетіп, ата-аналарды балалардың шынайы балалық шағын сақтауға үндеді, деп хабарлайды Paryz.kz.
Дина Төлепберген 14 жасқа дейінгі балаларға смартфон бермей, байланыс үшін батырмалы телефонмен шектелуді ұсынды. Ол бақылаусыз интернет пен әлеуметтік желілердегі контент баланың психологиясы мен танымдық қабілетіне кері әсер етуі мүмкін екенін атап өтті.
Сонымен қатар журналист ата-аналарды баласына қымбат гаджет алып беру үшін қарызға немесе несиеге батпауға шақырды.
Оның айтуынша, баланың уақыты виртуалды әлемге емес, отбасымен бірге өткізетін шынайы әрі жарқын сәттерге толы болғаны маңызды.
Тележүргізушінің бұл пікірі әлеуметтік желі қолданушылары арасында қызу талқылануда. Аудиторияның бір бөлігі смартфон қолдануға шектеу қою туралы ұсынысты қолдаса, енді бірі қазіргі заманда смартфонсыз оқу мен баланың қауіпсіздігін қамтамасыз ету қиын екенін алға тартып отыр.
