Астана
11.37°C
Астана
11.37°C
Әнші әрі композитор Өктем Алтаев жастық шағындағы жауапсыз махаббаты жайлы «Менің өмірім» бағдарламасында ашық айтты, деп хабарлайды paryz.kz.
Өнер иесінің айтуынша, болашақ жары болады деп сенген сүйіктісінің өзге жігіті бар екенін естіген сәті оның өмірінде ауыр із қалдырған. Дәл сол кезеңде жүректен шыққан «Не жаздым, жаным, саған?» әнін жазған.
«Бұл әнді шынымен де күйзеліске түскен кезде жаздым. Мен біреуді жақсы көрсем, бар жүрегіммен беріле сүйетін адаммын. Бір қызбен танысып, бар махаббатымды соған арнадым. Болашаққа жоспар құрдық. Сөйтсем, оның оқып жүрген жерінде жігіті бар екен. Маған оны айтпаған. Үйлену туралы сөйлесіп, арада сенім де қалыптасқан еді. Ер адам ғой, “үйленеміз, балаларымыз болады” деп болашақты елестетесің. Бірақ ол “болмайды” дегенде төбемнен су құйғандай сезіндім. Өмірге деген құлшыныс та, адамдарға деген сенім де жоғалды. Жеңгелерім қыз туралы сөз қозғап қалса, «айтпа» деп жиіркенетінмін. Бір қыздың кесірінен бүкіл қазақ қыздарын жек көріп кеткендей күй кештім. 1–2 жыл қатты күйзелісте жүрдім», – дейді ол.
Композитор бүгінде жастық шағында ғашық болған арудың өз бақытын тауып, өмір сүріп жатқанын да жасырмады.
«Ол қыз бұл әннің өзіне арналғанын біледі. Құдайға шүкір, қазір бақытты. Тағдыр ғой… Әрине, сырттай байқап жүресің. Солай болды», – деді Өктем Алтаев.
