Астана
4°C
Астана
4°C
Актриса Жанель Макажан әлеуметтік желідегі оқырманының сұрағына жауап беріп, бұрынғы күйеуі, актер Абай Асылханмен не себепті ажырасқанын баяндады, деп хабарлайды Paryz.kz.
Өнер иесінің айтуынша, отбасылық өмірінде күйеуінің туыстарымен арада түсініспеушілік, қолдаудың болмауы және сатқындық сияқты жағдайлар болған.
Актриса бұрынғы жолдасының өз отбасы мүшелерінің ықпалынан шыға алмағанын және әйелі мен балаларын қорғамағанын мәлімдеді.
«Әйелдер сенеміз ғой, барымызды береміз: энергиямызды, ақшамызды, мотивациямызды. Еріңе сенесің. Екі дүниенің бақытын бірге көреміз деп барыңды саласың. Барлығы керемет болады деген аңғал сеніммен жүресің. Одан қалды, сені алдап, опасыздық жасаса, сатқындық жаныңды ауыртады екен», – деп жазды Жанель Макажан.
Актриса бастапқыда жігіттің отбасы тарапынан қарсылық болған жағдайда мұндай қарым-қатынасты байыппен қарастыру қажет екенін де атап өтті. Оның пікірінше, ерлі-зайыпты бір-біріне қолдау көрсетіп, барлық қиындықты бірге жеңуге дайын болса, отбасын сақтап қалуға мүмкіндік бар.
«Ал ерің отбасын емес, өз туыстарының айдауымен кетсе, не қайыр? Никак қайыр жоқ», – деді актриса.
Жанель Макажан бұл оқиғаға қатысты әлі де айтылмаған жайттар бар екенін айтып, болған жағдайдың егжей-тегжейін толық баяндаса, көпшілік таңғалуы мүмкін екенін жеткізді.
