«Мұғалімнен таяқ жедім»: әнші Саят Медеуов қалаға кетуіне не түрткі болғанын айтты

Әнші «Таңшолпан» бағдарламасында балалық шағы туралы айтты.

«Ауылда Күлипа деген мұғалімімнен оқушылардың көзінше екі рет таяқ жедім. Бірі – сыныптастарымның алдында, екіншісі – «линейкада» тұрғанда. Ол кісі сынып жетекшім болатын. Сол намысыма тиіп кетті де, 8-сынып бітірген соң ауылдан кетіп қалдым. Апайыма рахмет айтамын, әпкеміздің шапалағын жеймін деп, қазір қалада шоколад жеп жүрмін. Сол себеп болмаса, мүмкін, өмір жолым басқа арнаға бұрылар ма еді, кім біледі», - деді ол. 

Саят Медеуов ол кезде қазіргідей емес, балалар мұғалімнен қатты қорқатын еді дейді.

«Алғашқы қоңырау ғой. Ең алдыңғы партада отыратынмын. Балалар артқы жақта шуласып жатқан, соған қарап күліп тұр едім. Бір кезде сынып жетекшім келіп қалыпты. Мен оны байқамай қалыппын. Алдыма қарап едім, ол кісі «Неге ыржиып тұрсың?» деп шапалақпен тартып жіберді. Екінші ретте, «линейкада» сапта тұрғанымда сыныптасым итеріп жіберді де, алға қарай бір қадам шығып кетті. Ана кісі көріп қалды да, тағы да таяқ жедім. Мектепте бұзық болмадым, себебі біз ол кезде мұғалімдерден қатты қорқатынбыз», - дейді әнші.