Астана
11.64°C
Астана
11.64°C
Әнші Димаш Құдайберген жас әнші Садраддиннің Алматыда өткен жеке концертін жоғары бағалап, оның анасы Айгүл Есқараға ақ тілегін жеткізді, деп хабарлайды paryz.kz.
Өнер иесі Садраддиннің концертінен үзінділер көргенін айтып, оның жетістігіне қуанышты екенін жеткізді.
«Балаңыздың аяқ алысы құтты болсын. Концерттің үзінділерін көрдім, керемет өтіпті. Бәріміз қуанып жатырмыз. Ініміздің алар белесі мен жеңістері көп болсын. Балаңыздың жетістігіне қуанып, нұрланып тұрған жүзіңізді көргенде, мен де өз анам қуанып тұрғандай ерекше күй кештім. Ұзағынан сүйіндірсін», – деді Димаш.
Әнші шетелдегі дайындықтарына байланысты Садраддиннің концертіне қатыса алмағанын айтты. Дегенмен ол жас өнерпаздың болашағына сенім білдіріп, халықаралық деңгейге көтерілетініне тілектестік білдірді.
«Өзімнің дайындықтарыммен шетелде жүргендіктен, қолым босамады. Елде болғанда міндетті түрде қолдар едім. Садраддиннің, Алла қаласа, халықаралық деңгейге шығып, әлем бойынша бір стадионды жинап, концерт беретін күні болсын», – деді әнші.
Өз кезегінде Садраддиннің анасы Айгүл Есқара Димаш Құдайбергеннің ұлына айтқан ақ тілегіне ризашылығын білдірді. Ол өнер адамдарының бір-біріне қолдау көрсетуі маңызды екенін атап өтті.
«Әлем төбесіне көтеріп, мақтаныш тұтып жүрген Ақ Димаштың ақ тілегін қалай алмайын?! Қалай мақтаныш тұтпайын?! Өссе, қазағымыз өссін! Аяқтан шалу – болмағырдың ғана ісі», – деді Айгүл Есқара.
