Астана
4°C
Астана
4°C
Танымал әнші әрі актриса Айгүл Иманбаева бала кезінде отбасындағы зорлық-зомбылыққа куә болғанын, оның ересек өміріне де әсер еткенін айтты, деп хабарлайды paryz.kz.
Өнер иесі бұл тақырыптың өзі үшін ауыр екенін айтып, ата-аналарды балалардың көзінше жанжал шығармауға шақырды.
Әншінің айтуынша, соның әсерінен зорлық-зомбылық туралы «Бақыт» фильміндегі рөлден бас тартқан. Сценарийді оқыған кезде бала күніндегі оқиғалар есіне түсіп, қатты күйзелген.
«Сценарийді оқып отырып, бұлшықет жады ма, әлде бұрынғы сырқаттарым оянды ма, білмеймін, аяқ-қолым дірілдеп, жылап қалдым. Баянға хабарласып, бұл рөлден бас тарттым», – деді әнші.
Ол бірнеше жылдан бері психологпен жұмыс істеп, балалық шағындағы психологиялық жарақаттардан арылуға тырысып жүргенін айтты. «Бала кезімде әкемнің анамды ұрғанын, ата-анамның бір-бірімен жанжалдасқанын көрдім. Сондықтан қазір де біреу дауысын көтерсе, қорқамын. Ішімдік ішкен адамды көрсем, аяқ-қолым дірілдейді», – деді Айгүл Иманбаева.
Өнер иесінің айтуынша, бала кезінде көрген зорлық-зомбылық адамның кейінгі өміріне әсер етуі мүмкін.
«Кейін сол жағдайлар өміріңде айна-қатесіз қайталануы мүмкін. Менің жеке өмірімде де сондай жағдайлар болды. Сондықтан бұл мәселені бала тәрбиесінен бөлек қарауға болмайды», – деді ол.
Айгүл Иманбаева ата-аналарды баланың көзінше ұрыспауға және оның тәрбиесіне жауапкершілікпен қарауға шақырды.
«Баланы өмірге әкелгеннен кейін оның тәрбиесіне жауапкершілік алу керек. «Тәрбие тал бесіктен басталады» деп бекер айтылмаған», – деді әнші.
