Астана
4°C
Астана
4°C
Әнші әрі актриса Айгүл Иманбаева бала тәрбиесі мен ата-ананың ойлау жүйесі туралы пікір білдірді. Өнер иесі баланың басынан түрлі жағдайдың өтуіне ата-ананың алаңдаушылығы мен жағымсыз ойлары әсер етуі мүмкін екенін айтты, деп хабарлайды paryz.kz.
Бұл туралы ол Instagram-дағы парақшасында жариялаған видеосында айтты. Айгүл Иманбаева баласының қауіпсіздігіне шамадан тыс алаңдайтын аналарды сынға алды.
«Баланың ең бірінші жауы – туған анасы. "Балам ауырып қалмады ма, көлік қағып кетпеді ме?" деп өзінің ойында жүретін мыңдаған жаман ойларын ойлай-ойлай баласы жайлы дән секілді жерге себеді. Ол тұқым 5, 10, 20 жылдан кейін өсіп, жемісін береді», – деді әнші.
Өнер иесінің сөзінше, ата-ана баласының басына бір жағдай түскенде «мен білгенмін, сезгенмін» деп жатады.
Алайда ол мұны алдын ала сезу емес, адамның өз ойымен қалыптастырған түсінігі деп санайды. Сонымен қатар Айгүл Иманбаева баланы шектен тыс жақсы көрудің де дұрыс емес екенін айтты.
«Ішіңдегі жақсы көретін баланың өзін орнымен, "Алланың аманаты ғой" деп қана жақсы көру керек. Қазақта "балам үшін Астанаға көштім, ауылдан Алматыға көштім" деп өмір сүріп жатыр. "Балам үшін" деген ұғым – қорқынышты нәрсе», – деді ол.
Әншінің пікірінше, ата-ана алдымен өз өміріне көңіл бөліп, рухани тұрғыда үйлесімді өмір сүруге ұмтылуы керек.
«Сіз өзіңіз үшін өмір сүріңіз. Сіз бүтін болсаңыз, рухыңызбен бірге гармонияда өмір сүрсеңіз, балаңыздың өмірі де, сізбен қарым-қатынасы да онсыз да гармонияда болады», – деді Айгүл Иманбаева.
