Астана
4°C
Астана
4°C
Әнші Айгүл Иманбаева қоғамда өнер адамдарына қатысты қалыптасқан кейбір түсініктерді сынға алды. Ол әртісті білімсіз немесе клоун ретінде қабылдау дұрыс емес екенін айтты, деп хабарлайды paryz.kz.
«Қоғамда қалыптасқан өте қате, теріс түсініктер бар. "Әртіс – білімсіз, әртіс – клоун" дейді. Бұл өте дұрыс емес ұғым. Мен өзім оқығанды, ізденгенді жақсы көремін. Төрт дипломым бар», – деді Айгүл Иманбаева.
Өнер иесі докторантураға түсуге ниетті екенін айтып, бұл шешімін 20 жылдық педагогикалық тәжірибесімен байланыстырды.
«Докторантураға тапсыру себебім – менің 20 жылдық педагогикадағы жұмыс өтіліммен зерттейтін дүнием өте көп. Өнердің қоғамдағы қызметі өте маңызды», – деді ол.
Айгүл Иманбаева өнер адамдарының қоғамдағы рөліне де тоқталды. Оның пікірінше, әртістердің де қоғам алдында айтары, атқаратын міндеті мен миссиясы бар.
«Өнер адамдары жер дауы, ел дауы болғанда алдыңғы шепке лақтыратын клоун емес. Ақымақ адамдардың қатарында емес. Қоғамда айтары бар, атқаратын міндеті, алып жүретін миссиясы бар мамандық иесі. Ол үшін тек оқу керек, даму керек. Мен доктор деген аты үшін ғана оқымаймын. Артымда қалдыратын дүние болғанын қалаймын», – деді әнші.
