«Әріп танымайды»: Оралда 10 жастағы бала қоқыс алаңында өмір сүрген

Бала туғаннан бері анасымен бірге қалалық қоқыс алаңында тұрған. Анасы жүйелі түрде ішімдік ішіп, әлеуметтік жағдайы қолайсыз ортада өмір сүрген. Облыстық білім басқармасының "Отбасылық үлгідегі облыстық балалар ауылы" КММ кәмелетке толмағандардың істері жөніндегі сотқа баланың анасын ата-ана құқығынан айыру туралы жүгінген.

"Бала еш жерде оқымаған, әріп танымайды, жаза алмайды. Қоқыстан тамақтанып, қоқыстан киім киген. Былтыр баланы кәмелетке толмағандардың істері жөніндегі комиссия Орал қаласындағы арнаулы әлеуметтік қызметтерге мұқтаж балаларды қолдау орталығына орналастырған", - дейді сот.

Кейін қалалық психологиялық-медициналық-педагогикалық консультацияның қорытындысы бойынша баланы ақыл-ойы бұзылған балаларға арналған арнайы мектеп-интернат-колледжіне жіберу ұсынылып, облыстық отбасылық үлгідегі балалар ауылының қамқорлығына берілген.

"Бала аталған мекемелерде болған уақытта анасы оған бір де бір рет бармаған. Ал ішкі істер органдарының өкілдері оның тұрғылықты жеріне барған кезде, анасы екі ер адаммен бірге мас күйде болған", - дейді Батыс Қазақстан облысының соты. Сот отырысы кезінде баланың анасымен байланысу мүмкін болмаған. Әйел ата-ана құқығынан айырылды.