Qazaq Air ұшағында болған жағдайға қатысты тергеу басталды

Оқиға сенбі болған. Қостанай-Астана тұрақты рейсін орындаған QazaqAir әуе компаниясының жолаушылар ұшағы техникалық ақаулыққа байланысты Қостанай әуежайына оралуға мәжбүр болды. Әуе компаниясы оқиғаға қатысты түсініктеме берді.

"Әуе кемесінде техникалық ақау болып, осыған байланысты ұшу процесі тоқтатылды. Кейбір жолаушылар шасси жанында жарқыл байқаған. Техникалық байқау жүргізу кезінде бұл ескерілетін болады. Авиакомпанияның техникалық командасы ақауларды тексеру және жою үшін Қостанай әуежайына жіберілді", - деп хабарлады компанияның баспасөз қызметі.

Жолаушыларға қонақүйге орналастыру, билеттердің құнын толық қайтару немесе оларды басқа рейстерге айырбастау ұсынылған. Ал көлік министрлігі тергеу жүргізілетінін мәлімдеді.

"Қостанай - Астана бағыты бойынша Qazaq Air әуе компаниясының рейсінде болған авиациялық оқиғаны тергеп-тексеру үшін саладағы ережелерге сәйкес арнайы комиссия құрылады. Бұл жұмысты министрліктің көліктегі оқиғаларды тергеу департаменті жүргізеді", - деді ведомстводағылар.