Facebook-тің қазақстандық 3 миллионнан астам қолданушысы туралы дерек тарап кетті

Бұл туралы KZ-CERT "Мемлекеттік техникалық қызмет" АҚ ақпараттық қауіпсіздік жағдайын зерттеу аясында компьютерлік инциденттерге ықпал ету қызметі анықтаған, деп хабарлады paryz.kz.

"Кеше хакерлік форум қолданушыларының бірі Facebook әлеуметтік желісінің 106 елінен 533 миллионнан астам қолданушы туралы мәліметтер базасын жариялады. Материалдарды зерттей келе, Қазақстандағы 3 214 990 қолданушының аты-жөні мен тегі, телефон нөмірі, тұратын елі, қаласы, жұмыс орны және оқуы туралы мәліметтердің желіге тарап кеткені анықталды", - делінген ресми хабарламада.

Желі қолданушыларының жеке мәліметтерінің тарап кетуінің салдары ауыр болуы мүмкін. Қаскүнемдер жеке мәліметтерді пайдалана отырып, желі қолданушысын бопсалауы, банк карточкасынан ақша шығарып алуы, жеке өміріне араласуы ықтимал. Тіпті, балалары қайда оқитынын біліп алып, зиян келтіруі мүмкін.

"Компьютерлік инциденттерге ықпал ету қызметі қазақстандықтарды әртүрлі көздерден хабарламалар мен қоңыраулар алу кезінде сақ болуға шақырады. Еске сала кетсек, Қазақстан Республикасында жеке деректерді жинау және тарату "Дербес деректер және оларды қорғау туралы" Заң негізінде жүзеге асырылады. Бұл заң шетелдік сайттарға қолданылмайды. Сондықтан жеке деректеріңізді сақтау үшін және қаскүнемдерден қорғану үшін отандық әлеуметтік желілерді қолдануды ұсынамыз", - делінген порталда.