«Не оттаса да үндемедім»: Адвокат зорландым деген Әнару Құрманәлі жайлы бар шындықты айтты

«Осы уақытқа дейін ауру адамды аяп, не оттаса да, үндемей келгем... Әңгіме – бір композитор ағамыздың аты әбден шыққан, ар мен абырой деген ұғымнан жұрдай қызы туралы... Бұл тақырыпта енді мүлде сөз қозғамаймын дегенмін. Бірақ жазуға тура келіп тұр. Өйткені менің абыройыма күйе жағып, ойына келген сөздерді айтып, ұмытыла бастаған атын қайта жаңғырту мақсатында көлдей пост жазыпты. Оны маған қазір ғана қызым жіберді. Осы уақытқа дейін ол қыз туралы шындықты көріп-білсем де, қыз абыройы мен ары нәзік нәрсе ғой деп, жақ ашпадым... Адвокаттық құпияны да сақтау керек болды. Ал енді мәселе өзіме келгенде, өз арым мен абыройыма нұқсан келсе, адвокаттық құпияны бұзғаным үшін жауап бермеймін. Бір жағы екінші тараптың да кінәсі болғасын, отбасылы еркектің әйелінің үстінен басқа қыздармен ойнастық жасағанын (қатты кетсем, айып етпессіздер, қазақтың сөзі ғой) ешқашан құптамағандықтан, ол жігіт істеген ісіне тым болмаса, ұялар деген үміт болды. Қалдыбек ағамыз да қызының сырын білгесін, «ел алдындағы абыройым айрандай болмас үшін жігіт кешірім сұраса, мен тоқтатам деп өзім айтам ел алдында» деді. Бүкіл туған-туысы, әкесі, бауырлары теріс айналған науқас қыздың ісіне араласқаныма талай мәрте өкіндім... Бірақ мақсат – бастаған істі аяқтау, елге жария болған қыз абыройын жабу болды», – деді ол.

Ләззат Ахатова бұл іске араласуына не себеп болғанын бүге-шүгесіне дейін баяндап берді.

«Бір күні желіден елдің дені жабылып, тілдеп жатқан қыздың сұқбатын көзім шалды. Бір спортшы зорлады деп, журналистерге сұқбат беріп тұр екен. Өзіміз де қыз өсіріп отырғасын, қыз баланың тағдырына бей-жай қарай алмаймыз ғой. Кімнің қызы екенін білген де жоқпын, ол кезде. Біреулер Қалдыбек Құрманәлінің қызы ма деп жатыр екен. Қатты араласқан кісім болмағасын, онша мән бермедім. Кімнің қызы екені бәрібір еді. Анам қайтыс болған деп жатқанын естідім. Сол сөз ғой, әйел-аналардың жүрегіне дөп тиетін. Ол қыз манипуляцияны әбден меңгерген әккі екенін қайдан білсін, былайғы жұрт? Бәрінен бұрын ана ретінде пост жаздым. Сілтемесін тапсам, салам. Сонымен болды. Мен ары қарай өз шаруаларыммен айналысып кеткем. Қазақтың бір қызының тағдыры ғой деген жанашырлық ниетпен болыстық қой. Сол күні түнде маған белгісіз нөмірден бір смс хабарлама түсіпті. Қыздың әкесі Қалдыбек ағамыз жазыпты. Нөмірімді Айгүл Елшібаевадан алыпты. Мен ол жазған хатын тауып алуға тырысам. Хатта кешегі сұқбат берген қыздың оралдық ақын әйелден туған қызы екенін, қыздың анасымен азаматтық некеде тұрғанын, бір ұл, бір қызы барын айтыпты. Ата-ана ретінде кім болса да, бұндай жағдайда түсіністікпен қарап, жұбату сөз айтады. Мен де солай жасадым. Мессенжерге Әнарудың өзі шығып, қолдағаныма алғыс айтыпты. Сонымен әңгіме тәмам болған. Ертесі қыздың әкесі тағы жазды. Гонорарың қанша болады, сені адвокат етіп алсақ деп. Мен бірден бас тарттым. Адвокатты сол жақтан, Алматыдан тапқаныңыз жөн дедім. Сол күйі бас тартуым керек екен... Біреуді түсіну, біреуге жан ашу құртады ғой, бізді. Екі ортада Әнарудан мессенжерде тергеудің қалай болғанын сұрап, анасы жоқ жетім қыз ғой, әкесінің бөлек отбасы бар, жалғыз ғой деп, жаным ашып, құқықтық кеңестер бердім. Қорғаушысы болмай тұрып. Содан Қалдыбек аға тағы шықты. Ақшам жоқ, жағдайым нашар деген әңгіме айта бастады. Мен гонорар туралы сөз де қозғамай жатып. Сосын мен “аға, мен онсыз да қазақтың қиындыққа түскен қыздарын қолдаймын. Тиыныңсызсыз да, қызыңыз екенін білмей -ақ, танымасам да, қызыңызды қолдадым. Ары қарай да қолдаймын, бір тиыныңыздың керегі жоқ" дедім», - дейді заңгер.

Ашуға булыққан адвокат Әнарудың барлық айтқанын жоққа шығарды.

«Енді осы жерде ол кісі ренжісе де, айтпасқа амал қалмады. Атым бұл істе аталмасыншы деп еді. Алматы қалалық сотының төрағасы болған Нұрлан деген ағамыз бар еді. Қазір Европада тұрады. Менің қайын атама іні боп, отбасымызбен араласқан және сыйлас кісі еді. 2005 жылы судьялыққа өту үшін, осы Астанада емтихан тапсырып жүргенде, комиссия құрамының мүшесі болатын. Сол кісі телефон соқты. Белгісіз шетелдік нөмірден, “Ләззат, қарындасым, амансың ба? Нұрлан ағаң ғой” - деп жазыпты, алдымен. Ұялғанымнан трубканы көтердім. Қысқасы, сол кісі сұранды, ақырында. Осы іске көмектесуімді. Қыздың әкесіне ағайындығы бар екен, түсінгенім. Мен Қалдыбектен де, оның науқас қызы Әнарудан да гонорар алған емеспін. Постында «1 млн теңге гонорар бердік» деп бөсіпті. Тап бір өзі бергендей. Тиын-тебен туралы жазуды ар санаушы ем, амал жоқ, жазбасындағы қып-қызыл жаласы мен қырық өтірігіне Сіздер үшін жауап беруге тура келіп тұр. Бұл уәждер бір жағы сотқа да керек. Қағаз жазуға мұрша болмай жүр еді. Амал жоқ, екі сотқа арыз жазғалы жатырмын. Клеветамен, сосын ар-намыс, абыройды қорғау бабымен. Әкесі екеуінен 10 млн теңге моральдық шығын өндірем. Адамның ар-абыроймен, көңілімен, жүйкесімен ойнағанның қандай болатынын көрсін. Ақыры олардың қалтасынан көк тиын төленген жоқ. Әкесі өзінен-өзі ақшам жоқ, аурумын деп “жылап” кеткенінен ыңғайсызданып, тегін қорғаймын дегенге Нұрлан аға менен ыңғайсызданып кетсе керек, сол кісі салған, ол соманы. Мен пәлен-түген деп, ешқандай сома айтқан жоқпын. Қылмыстық істер негізі 3-5 млн-ның аралығы. Қатты көп беріп қойды деп, іштері ашып жатса, басқа астаналық, алматылық адвокаттардан сұрасын. Бұлай әкесі мен қызы қосылып, жүйкемді тоздыратынын білгенде, гонорарым кемі 5 млн деуім керек еді. Сол күйі жоламай, құрып кететін. Мен де бәледен аулақ болар едім. Комментарийге қолымдағы бар скриндерді салайын. Сосын қалғанын тауып, постты ары қарай жалғастырам. Серийный постар кететін болды-ау... Бұл қыздың шын болмысын ашып көрсетіп берейін, елге. Қанша ренжісем де, арын ойлап, қыз бала ғой деп, соңына дейін позициямда тұрып, зорланған деп, Жанқошты кінәлап, жазғанымды өздеріңіз де білесіздер. Ал енді шындықты жазайын», - деді Л. Ахатова.