«Бұл – ана жүрегі үшін ерекше сәт»: Алтынай Жорабаева қызының сырға салу рәсімінен жүрекжарды жазба жариялады

Өнер иесі алдымен жаңа құдаларына есік-төр көрсеткенін айтып, бұл күнге жеткізген Жаратқанға шүкіршілік етті.

"Алланың қалауымен жаңа құдаларымызға есік-төр көрсетіп жатырмыз. Осындай қуанышты күнге жеткізген Раббыма шүкір. Дастарханымыз берекелі, дастық қарым-қатынасымыз ғұмырлы, екі әулеттің арасы сыйластық пен татулыққа толы болсын. Әумин!", – деп жазды әнші.

Кейін Алтынай Жорабаева қызы Айаруды құдаларына көрсетіп, болашақ күйеу баласына төс тарту дәстүрі орындалғанын жеткізді. 

"Қызымызды құдаларымызға көрсетіп, күйеу баламызға төс тарттық. Дәстүріміздің әр сәті – береке мен сыйластықтың белгісі. Алла екі жасқа бақытты ғұмыр нәсіп етсін", – деді ол.

Сондай-ақ әнші қызының сырға салу рәсімі өткенін айтып, ана жүрегі үшін бұл ерекше сәт екенін жасырмады.

"Міне, Аллаға шүкір, қызым сырғалым атанды. Бұл – ана жүрегі үшін ерекше сәт. Алла екі жасқа татулық, береке, ұзақ ғұмыр мен иманды ұрпақ нәсіп етсін", – деп жазды Алтынай Жорабаева.