Оңтүстік Кореяда 21 жастағы қазақстандық қамауға алынды

Жергілікті БАҚ-тың мәліметінше, оқиға 29 шілдеде Ичхон қаласында болған. Екі жігіт басқа көлікті қуып жетіп, ішіндегі адамдарға қоқан-лоқы көрсеткен. Олар көліктің жолын бөгеп, жолаушыларға қауіп төндірген. Оқиға бейнебақылау камерасына түсіп қалған. Корея полициясы күдіктілерді үш ай бойы іздеген. Қараңғыда көлік нөмірін анықтау қиындық туғызған. Кейін мамандар нөмірдің бір бөлігін анықтап, күдіктілердің бірін әлеуметтік желіде көлік сату туралы жариялаған хабарландыруы арқылы тапқан.

Күдікті Оңтүстік Кореяда жұмыс істеп жүрген 21 жастағы Қазақстан азаматы болып шықты. Ол 16 қазанда ұсталды. Екі күннен кейін сот оның жасырынып қалуы мүмкін екенін ескеріп, қамауға алуға санкция берген.

Жауап алу кезінде қазақстандық оқиғаның түсініспеушіліктен туындағанын айтқан. Оның сөзінше, бұған дейін ол көлігін шетелдік азаматқа сатпақ болған, бірақ мәміле жүзеге аспаған. 

Сондықтан ол жәбірленушінің көлігін сатып алушының көлігімен шатастырып алғанын мәлімдеген. Оқиғаға қатысы бар деп күдікке ілінген екінші азамат — Қазақстанның 25 жастағы азаматы. Ол бұған дейін көші-қон заңнамасын бұзғаны үшін Оңтүстік Кореядан депортацияланған. Бұл туралы әлеуметтік желіде жарияланған ақпаратта айтылған. Қазақстанның Сыртқы істер министрлігі оқиғаны растады. 

"Қазақстан Республикасы Сыртқы істер министрлігі Ичхон қаласы полициясының Қазақстан азаматын ұстағаны туралы хабардар. Отандасымызға бірқатар құқық бұзушылық, соның ішінде бөтеннің мүлкін бүлдіру, көші-қон режимін сақтамау және автокөлікті пайдалану қағидаларын бұзу бойынша айып тағылып отыр", — деп хабарлады ведомство.

Министрліктің мәліметінше, қазақстандық дипломаттар істі бақылауда ұстап, ұсталған азаматқа консулдық-құқықтық көмек көрсетіп жатыр.