Қазақстан армиясында смартфондарды ресми түрде пайдалануға рұқсат берілді, бірақ кейбір шектеулер бар

Қорғаныс министрінің қызметтік мақсаттағы техникалық құралдарды (ұялы байланыс құрылғылары мен мобильді құрылғыларды) әкелу, әкету және пайдалану қағидаларын бекіту туралы бұйрығына өзгерістер енгізілді. Аталған құжат «қызметтік пайдалану үшін» белгісімен рәсімделген.

Бұған дейін сарбаздарға телефондарды тек қатаң белгіленген уақытта және тек казарма ішінде ғана пайдалануға рұқсат етілетін. Сонымен қатар, тек батырмалы телефондар қолданылып, олар қысқа уақытқа ғана берілетін.

Қазіргі таңда (ағымдағы жылдың 30 наурызында енгізілген өзгерістерге сәйкес) сарбаздарға, курсанттар мен кадеттерге телефондарды орналасу орнына дейін өшірулі күйде алып кіруге және алып шығуға рұқсат етіледі. Смартфондарды өз бөлімшесінің аумағында (яғни казармада), сондай-ақ әскери госпитальдарда, әскери-медициналық бөлімдер мен мекемелердің емдеу және диагностикалық бөлімшелерінде пайдалануға болады.

Телефондарды пайдалану тәртібі мен уақыты жергілікті жерде командирлер тарапынан белгіленеді. Әдетте бұл жауынгерлік және мемлекеттік-құқықтық дайындық сабақтарына кедергі келтірмейтін, сарбаздардың жеке уақытымен шектеледі.