Ақтөбеде оқушы өз анасын өлтірді: Дәрігерлер әжесінің жағдайы туралы айтты

Оқиға кезінде 71 жастағы әже ауыр жарақат алған. 2 желтоқсанға қараған түні оны №1 қалалық көпсалалы ауруханаға көптеген пышақ жарақаттарымен жеткізген.

«Пациент біздің ауруханаға 1:40-та түсті. Жағдайы ауыр болды. Ол травматикалық және геморрагиялық шок алған, мойнында, жамбасында, иығында, білегінде, қолында көптеген кесілген және шаншылған жарақаттар, сыртқы қан кету, қабырғаларының сынуы, жабық кеуде жарақаты болды. Зардап шегуші реанимацияға жатқызылды, жарақаттары тігілді, қазір травматология бөлімінде ем қабылдап жатыр», – деді аурухананың бас дәрігері. 

Әже сөйлей алмайды және нашар естиді, алайда дәрігерлер оны келесі аптада амбулаториялық емге шығаруға үміттеніп отыр. Қайғылы оқиға 2 желтоқсанға қараған түні болды.

Оқиға орнына келген полицейлер зорлық-зомбылық белгілері бар әйелдің мәйітін тапты. Жасөспірім ұсталып, кінәсін мойындаған. Ол қамалды.