Қазақстандықтардың жеке деректерін сатқан 140 адам ұсталды

Мәліметтер мемлекеттік базалардан заңсыз алынған және Telegram-арналары арқылы таратылған, оның ішінде кейбір коллекторлық компанияларға да берілген.

«140-тан астам адам ұсталды, олардың қатарында компания иелері мен арна әкімшілері бар. Қазіргі уақытта бес күдікті қамауға алынды. Коллекторлық компанияларға жүргізілген тінту барысында 400-ден астам компьютерлік және басқа да электрондық техника тәркіленді», — деп хабарлады ІІМ Киберқылмысқа қарсы күрес департаментінің бастығы Жандос Сүйінбай. 

Аталған факті бойынша Қылмыстық кодекстің 205-бабының 3-бөлігі — «Ақпаратқа заңсыз қол жеткізу», 147-бабының 5-бөлігі — «Жеке өмірге қолсұғушылық және жеке деректер туралы заңнаманы бұзу», сондай-ақ 211-бабының 3-бөлігі — «Шектеулі қолжетімділігі бар электрондық ресурстарды заңсыз тарату» баптары бойынша қылмыстық іс қозғалды.