Қазақ елі Республика күнін ұлт мерекесі ретінде тойлады

1990 жылғы 25 қазанда қабылданған Қазақстан Республикасының мемлекеттік егемендігі туралы Декларация еліміздің болашақ тәуелсіздігіне жол ашқан тарихи құжат ретінде тарихта қалды. Бұл декларация Қазақстанның өз мемлекеттік саясатын, экономикасын және сыртқы қатынастарын дербес жүргізуге құқық берген алғашқы қадам болды. 2022 жылы Мемлекет басшысы Қасым-Жомарт Тоқаевтың бастамасымен 25 қазан – Республика күні қайтадан мемлекеттік мерекелер тізіміне енгізілді. Осылайша, бұл күн ұлттық мақтаныш пен отаншылдық рухты арттыратын маңызды датаға айналды.

2025 жылы мереке Астанада ерекше сән-салтанатпен өтті. Таңертең елорда тұрғындары мен қонақтары «Қазақ елі» монументі алаңында Мемлекеттік Туды көтеру рәсіміне қатысты. Әнұран шырқалып, әскери оркестр мен халықтық ансамбльдер өнер көрсетті.

Қалада «Тәуелсіздік рухы» атты мерекелік концерт ұйымдастырылып, белгілі әртістер мен жас орындаушылар сахна төріне шықты. Кешкісін елордалықтар үшін жарық-музыкалық шоу мен отшашу ұйымдастырылды. Сонымен қатар спорттық жарыстар, жастар форумдары, кітап көрмелері және ұлттық тағамдар жәрмеңкесі өтті.

Алматы қаласында да мереке кең көлемде өтті. «Медеу» мұз айдынында Мемлекеттік Туды көтеру салтанаты өтіп, гимн шырқалды. Қала орталығында қолөнершілер жәрмеңкесі, ұлттық тағамдар фестивалі мен мәдени көрмелер ұйымдастырылды. Балалар мен жастарға арналған «Біздің Отан – Қазақстан» атты шеру өткізіліп, жас буын өкілдері ұлттық киім киіп, отансүйгіштік әндер орындады. Алматы тұрғындары үшін бұл мереке спорт пен өнер, дәстүр мен жаңашылдық тоғысқан ерекше күнге айналды.

Еліміздің барлық аймақтарында мерекелік шаралар өтті. Өскеменде «Елімнің еркін рухы» атты көрме ашылып, ұлттық киімдер шеруі мен концерт ұйымдастырылды. Қостанай қаласының орталық алаңында этноауыл құрылып, халықтық концерт пен отшашу өтті. Түркістанда Қожа Ахмет Ясауи кесенесінің маңында «Бірлік пен бейбітшілік» атты концерт ұйымдастырылды. Маңғыстауда теңіз жағасында жастар фестивалі мен спорт сайыстары өткізілді. Ақтөбеде қайырымдылық жәрмеңкелері мен экологиялық сенбіліктер ұйымдастырылып, әлеуметтік жобаларға назар аударылды.

Мемлекет басшысы Қасым-Жомарт Тоқаев Республика күні қарсаңында халқымызға ресми құттықтау жолдап, бұл күннің тарихи маңызын ерекше атап өтті.

Президент өз сөзінде:

«25 қазан – халқымыздың тағдырына түбегейлі өзгеріс әкелген тарихи күн. Бұл – мемлекетіміздің іргетасы қаланған, егемендікке бастау болған ерекше дата. Егемен Қазақстанның басты күші – бірлігі мен берекесінде», – деді.

Осы күні ел игілігіне еңбек сіңірген азаматтарға мемлекеттік наградалар табыс етілді. Дәрігерлер, ұстаздар, ғалымдар мен мәдениет саласының өкілдері «Парасат», «Құрмет» ордендерімен марапатталды.

Денсаулық сақтау министрлігінің мәліметінше, Республика күні елімізде 709 нәресте дүниеге келді. Оның 359-ы ұл бала, 350-і қыз бала. Бұл дерек мереке күнін жаңа өмірдің басталуы, үміт пен шаттық символы ретінде айқындай түсті.

2025 жылғы Республика күні – елдің барлық өңірін қамтыған шынайы халықтық мереке болды. Бұл күн әрбір қазақстандықтың жүрегінде Отанға деген сүйіспеншілік пен мақтаныш сезімін оятты. Егемендіктің қадірі мен бірліктің мәнін ұғынуға мүмкіндік берді. Республика күні – өткен тарихқа тағзым етіп, болашаққа сеніммен қарауға шақыратын, тәуелсіздіктің рухын ұлықтайтын мереке. Еліміз аман, жұртымыз тыныш болып, көк туымыз биікте желбірей берсін.