Ақтөбе облысында мейрамханаға барған 102 адам ауруханаға түсті

Ақтөбе облыстық денсаулық сақтау басқармасының баспасөз қызметі NUR.KZ тілшісіне хабарлағандай, Мұғалжар ауданына қарасты Қандыағаш қаласындағы мейрамханаға барған азаматтар арасында ішек инфекциясы жағдайларының тіркелуіне байланысты эпидемиологиялық тексеру жүргізілуде.

"19 маусымнан бастап Мұғалжар аудандық ауруханасы мен облыстық клиникалық жұқпалы аурулар ауруханасына ішек инфекциясының белгілерімен 102 пациент медициналық көмекке жүгініп, ауруханаға жатқызылды. 

Оның ішінде 34 пацинетте сальмонеллездің ықтимал жағдайы тіркелді. Аталған жағдайлар бойынша Ақтөбе облысының Санитариялық-эпидемиологиялық бақылау департаментіне шұғыл хабарламалар жолданып, бактериологиялық зерттеу жүргізу үшін сынамалар алынды", - делінген хабарламада. 

Ведомствоның мәліметінше, ауруханаға жатқызылған пациенттердің жағдайы орташа ауыр деп бағаланып отыр. Оларға қажетті медициналық көмек толық көрсетіліп жатыр.

"Жағдайды үйлестіру мақсатында жедел штаб құрылып, Мұғалжар ауданына қосымша медициналық бригадалар жіберілді. Медициналық ұйымдарда қажетті төсек-орын қоры дайындалып, дәрілік заттардың жеткілікті қоры қамтамасыз етілді.

Пациенттердің аурухана дәліздеріне орналастырылғаны туралы ақпарат шындыққа сәйкес келмейді. Байланыста болған тұлғаларды анықтау және оларды медициналық бақылауға алу жұмыстары жүргізіліп жатыр. Жағдай тұрақты бақылауда", - делінген хабарламада.