Астана
18°C
Астана
18°C
Қаржылық мониторинг агенттігінің Қызылорда облысы бойынша департаменті мал шаруашылығын дамытуға бағытталған инвестициялық жобаның қаражатын жымқыру фактісін әшкереледі. Тергеу қорытындысы бойынша қылмыстық іс сотқа жолданды, деп хабарлайды Paryz.kz.
2021 жылы Жаңақорған ауданы тұрғындарын арзандатылған сапалы етпен қамтамасыз ету және ет бағытындағы мал шаруашылығын дамыту мақсатында «Байқоңыр» ӘКК» АҚ қатысуымен «Сыздық Ата» ЖШС бірлескен кәсіпорны құрылған болатын.
Жобаның жалпы құны 311 млн теңгені құраған. Оның ішінде «Байқоңыр» ӘКК 1 600 бас қой, 130 бас ірі қара мал және етті қаптауға арналған жабдықтар сатып алу үшін серіктестіктің жарғылық капиталына 151,5 млн теңге бөлген.
Тергеу барысында анықталған жайттар:
Жымқыру схемасы: Мал басы сатып алынғаннан кейін ЖШС басшысы қаржының бір бөлігін заңсыз шығарып алу схемасын ұйымдастырған.
Қолма-қол ақшаға айналдыру: Жалпы сомасы 60 млн теңге күдіктінің бақылауындағы «Нұрай» және «Абылайхан» ЖК шоттарына аударылып, кейін қолма-қол ақшаға айналдырылған.
Бұлтартпау шаралары: Күдікті қамауға алынып, сот санкциясымен оған тиесілі екі автокөлікке тыйым салынды.
Қазіргі уақытта қылмыстық іс соттың қарауына жолданды. ҚР Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жария етуге жатпайды.
