Астана
12.69°C
Астана
12.69°C
Қазақстан Республикасы Ішкі істер министрлігі ұйымдасқан қылмыстық топтардың (ҰҚТ) әрекетіне тосқауыл қою және жазаның бұлтартпастығы қағидатын қамтамасыз ету бағытындағы жұмыстардың қорытындысын жариялады. Жыл басынан бері ҰҚТ мүшелеріне қатысты 45 қылмыстық істің тергеп-тексеруі аяқталып, сотқа жолданды, деп хабарлайды Paryz.kz Polisia.kz-ке сілтеме жасап.
ІІМ мәліметінше, құқық қорғау органдары қылмыстық әрекеттердің барлық қатысушыларын анықтау, заңсыз әрекеттерін құжаттау және істі сотқа дейін жеткізу бойынша кешенді шараларды жүзеге асыруда.
Сотталған ҰҚТ мүшелері мен шығарылған үкімдер:
Қарағанды облысы: Тау-кен байыту кәсіпорындарынан мүлік ұрлаумен айналысқан қылмыстық қоғамдастықтың ұйымдастырушысы мен 10 қатысушысы 13 жылға дейін бас бостандығынан айырылды. Сонымен қатар, ірі кәсіпорын аумағынан алаяқтық схемалар арқылы ұрлық жасаған ҰҚТ басшысы мен 4 мүшесі 10 жылға дейін сотталды.
Алматы қаласы: Автокөліктерді заңсыз тіркеу, VIN-кодтарды өзгерту және алаяқтықпен айналысқан топтың 13 мүшесі 8 жылға дейінгі мерзімге жазаланды.
Астана қаласы: Есірткі таратқан ҰҚТ ұйымдастырушысы 17 жылға, ал оның 5 сыбайласы 16 жылға дейін бас бостандығынан айырылды.
Қызылорда қаласы: Кәсіпкерлерден жүйелі түрде ақша бопсалаған жергілікті қылмыстық ортаның 8 өкілі ҰҚТ құру және оған қатысу айыптары бойынша 11 жылға дейін сотталды.
Ішкі істер министрлігі ұйымдасқан қылмыспен күрес жұмыстарының тоқтаусыз жалғасатынын және дәлелдемелер базасы жинақталған әрбір іс соңына дейін жеткізілетінін атап өтті.
