Қазақстанда мерзімді әскери қызметке шақыру басталды

Бүгіннен қалалық және аудандық шақыру комиссиялары әкім орынбасарларының төрағалығымен азаматтарды мерзімді әскери қызметке шақыруға кірісті.

30 маусымға дейін 18-27 жас аралығындағы 21 мыңнан астам азаматты Қарулы күштерге және басқа да әскери құралымдардың қатарына шақыру жоспарланып отыр.

Олар: Қарулы күштерге - 11 мыңнан астам адам; ІІМ Ұлттық ұланына - 7 мыңнан астам адам; ҰҚК Шекара қызметіне - 2 мыңға жуық адам; Төтенше жағдайлар министрлігіне - 400-ге жуық адам; Мемлекеттік күзет қызметіне - 300 адам.

Барлығына SMS-хабарлама және eGov порталындағы хабарландырулар арқылы кемінде үш күн бұрын шақыру жіберіледі.

"Мұндай хабарламалар ресми шақыру болып есептеледі. Шақырту алған азамат жергілікті әскери басқару органына немесе шақыру пунктіне келуге міндетті", - дейді жұмылдыру жұмыстары департаментінің бастығы генерал-майор Алмас Исабеков.

Оның айтуынша, дәлелсіз себептермен жергілікті әскери басқару органдарына келмегені үшін әкімшілік шаралар қолданылуы мүмкін. Ал шақырудан жалтарған жағдайда қылмыстық жауапкершілік қарастырылған.