Астана күні: елорда мерекесі мыңдаған тұрғынның басын қосқан ауқымды мәдени оқиғаға айналды

Мерекелік іс-шаралар қаланың барлық алты ауданын қамтыды. Тұрғын алаптарда концерттер, фестивальдер, шығармашылық кездесулер, балаларға арналған ойын-сауық бағдарламалары мен ұлттық спорт жарыстары өтті. Күні бойы өткен мәдени шараларға қазақстандық эстрада жұлдыздары мен шығармашылық ұжымдар қатысып, қала тұрғындарына көтеріңкі көңіл күй сыйлады.

Астана күнінің басты оқиғаларының бірі «Астана Арена» стадионы мен «Қазақ елі» монументі алаңында өткен Open Air концерттері болды. Заманауи мультимедиялық технологиялар мен жасанды интеллект элементтері қолданылған концерттерге 100 мыңнан астам көрермен жиналды. Сахнада қазақстандық танымал әншілер мен музыкалық топтар өнер көрсетіп, мерекелік кеш ерекше атмосферада өтті.

Мереке аясында елорданың барлық ауданында тұрғындардың өмір сүру сапасын арттыруға бағытталған инфрақұрылымдық жобалар да пайдалануға берілді. Қала күніне орай 30-дан астам жаңа аула, гүлзар, спорт алаңы және қоғамдық кеңістік ашылды. «Халық қатысатын бюджет» бағдарламасы бойынша жүзеге асқан жобалар тұрғындардың ұсыныстары негізінде салынды. Жаңартылған аулаларда балалар ойын кешендері, спорт аймақтары, шағын футбол алаңдары және демалыс орындары пайда болды.

Астана күні экологиялық бастамалармен де ерекшеленді. «Таза Қазақстан» республикалық акциясы аясында қалада «Таза жағалау» сенбілігі, «Таза сана – таза қала» экологиялық викторинасы және мектепке дейінгі ұйымдардың қатысуымен қоршаған ортаны қорғауға бағытталған жобалар ұйымдастырылды. Қатысушыларға экологиялық мәдениет, қалдықтарды сұрыптау және коммуналдық қызметтің маңызы жөнінде танымдық ақпарат ұсынылды.

Спорттық бағдарлама да кең көлемде өтті. «Толағай» алыптар сайысы, «Астана сақасы» асық ату турнирі, күрес түрлерінен жастар фестивалі және ұлттық спорт жарыстары ұйымдастырылып, жүздеген жас спортшы өзара бақ сынасты. Мұндай жарыстар салауатты өмір салтын насихаттап қана қоймай, ұлттық спорт түрлерін дамытуға серпін береді.

Қала күні балалар мен отбасыларға арналған іс-шаралармен жалғасты. «Жетісу» саябағында «Отбасы Time» фестивалі өтіп, шығармашылық шеберлік сабақтары, интерактивті алаңдар, экологиялық жобалар мен балаларға арналған ойын бағдарламалары ұйымдастырылды. Сонымен қатар Достық үйінің алаңында өткен «Өнермен нұрланған асқақ Астана» фестивалі түрлі этномәдени бірлестіктердің өнерін біріктіріп, қоғамдық келісім мен мәдени әралуандықты дәріптеді.

Елорда күні қала өміріндегі қуанышты оқиғалармен де есте қалды. 6 шілде күні Астанада 24 сәби дүниеге келді. Дәрігерлердің мәліметінше, барлық ана мен нәрестенің жағдайы жақсы.

Биылғы Астана күні мерекесі мәдениет, өнер, спорт, экологиялық бастамалар мен жаңа инфрақұрылымдық жобаларды біріктірген ауқымды қоғамдық оқиғаға айналды. Мыңдаған тұрғынның басын қосқан мерекелік бағдарлама елорданың заманауи келбетін, қоғамдық белсенділігін және тұрғындарға қолайлы қалалық ортаны қалыптастыру бағытындағы жұмыстарды тағы бір мәрте көрсетті.