Алматы облысында баласын асыраудан бас тартқан 33 адам сотталды

Ведомство мәліметінше, осы жылдың сегіз айында 3,5 млрд теңге көлеміндегі алименттік берешек өтелді. "Қылмыстық кодекстің 139-бабы (балаларды асырауға арналған қаражатты төлеу жөніндегі міндеттерді орындамау) бойынша қасақана төлемеген 50 борышкер қылмыстық жауаптылыққа тартылды. Оның ішінде 33 адам сотталып, тағы 17 іс берешектің ерікті түрде өтелуіне байланысты тоқтатылды. Мысалы, аудандық сот борышкер "А"-ны 2,1 млн теңге қарызы үшін бір жылға бостандығын шектеуге үкім шығарды. Ол екі жылдан астам уақыт бойы баласын асырау жөніндегі міндетін орындамаған", - делінген хабарламада.

Сонымен қатар алименттік қарыздарды өтеу үшін 4 жылжымайтын мүлік (жер телімдері, үйлер) тәркіленді.

Мәселен сот орындаушысы 5 млн теңге берешегі бар борышкер оның орнына "И"-дің Еңбекшіқазақ ауданындағы 100 шаршы метр тұрғын үйді өндіріп алды.

"Прокуратураның бастамасымен 169 борышкер әкімшілік жауаптылыққа тартылып, олардың 108-і 5 тәулікке дейін қамауға алынды. Мұндай шаралар ата-аналық міндеттемелерін қасақана орындамай жүргендер үшін айқын тәжірибе болып отыр", - деп атап өтті прокуратура өкілдері.

Прокуратура алименттік міндеттемелердің әлеуметтік маңызы зор екенін, ал оларды орындаудан жалтарған әрбір жағдай қылмыстық-құқықтық және әкімшілік тәртіппен жолы кесілетінін хабарлайды.