Астана
9°C
Астана
9°C
Қонаевта кәмелетке толмаған баланы 22 жастағы жүргізуші тізгіндеген Hyundai автокөлігі қағып кетті, салдарынан бала көз жұмды, деп хабарлайды paryz.kz.
Алматы облысы Қонаев қаласында баланың өліміне әкеп соққан жол-көлік оқиғасы бойынша қылмыстық іс қозғалды. Қайғылы оқиға туралы Instagram-дағы "egovpress" парақшасында жарияланды.
"Алматы облысы Қонаев қаласының тұрғындары №10 шағын ауданда баланы көлік қағып кеткенін хабарлауда. Тұрғындардың айтуынша, көшеде тіпті жаяу жүргіншілер жолы да жоқ", - делінген жазбада.
Айта кетейік, жол апаты кеше, 20 қыркүйекте болған.
"Алдын ала мәлімет бойынша, 20 қыркүйекте сағат 18:40 шамасында Қонаев қаласының көшелерінің бірінде Hyundai автокөлігінің 22 жастағы жүргізушісі жолдың жүріс бөлігінде болған кәмелетке толмаған баланы қағып кетті. Алған жарақаттарының салдарынан бала оқиға орнында көз жұмды", - деп хабарлады Алматы облысы ПД өкілі.
Қазіргі уақытта оқиғаның барлық мән-жайын анықтауға бағытталған барлық қажетті тергеу әрекеттері жүргізілуде. Тергеу полиция департаменті басшылығының бақылауында.
