Азат Перуашев "Ақ жол" партиясының төрағасы қызметінен кетті

"Ақ жол" партиясының төрағасы Азат Перуашев партия съезі кезінде қызметінен кететінін мәлімдеді.

"Осы шешімді қолдауларыңызды және оған қарсы шықпауларыңызды сұраймын. Сондай-ақ уақытты жоғалтпай, жағдайға белгісіздік туғызбау үшін съездің қарауына жаңа төраға лауазымына кандидат ұсынамын. Менің ойымша, жаңа төрағаның өз идеясы мен харизмасы, өз стилі мен партиямыздың болашағына деген көзқарасы болуы керек. Қалай болғанда да, ол сырттан келген адам бола алмайды. Ол табысты тұлға, қоғам мен сайлаушыларға "Ақ жолдың" көшбасшыларының бірі ретінде танымал, біздің партиямен тікелей байланысты адам болуы керек. Мен вице-спикер Дания Еспаеваны ұсынамын", - деді ол.

Перуашев партияластарының партия төрағасы ретіндегі 15 жылдығымен құттықтауы оған соңғы кездері өзі де ойға алып жүрген шешімді қабылдауға түрткі болғанын мәлімдеді. 

"Кез келген прогрессивті көшбасшылық, егер оны мезгіл-мезгіл жаңартып отырмаса, монополияға айналады. Ал монополия балама идеяларға кереғар, басқа адамдардың бастамаларын тұншықтырады және жеке басқа табынушылық тудырады. Біз мұны жақында ғана мемлекеттік деңгейде көрдік. Біреу өмірінің бір бөлігін арнаған істің дамуы мен өсуіне шынымен қызығушылық танытса, ол барлығына уақытылы алғыс айтуы керек. Әсіресе бүкіл ел саясатта, экономикада және технологияда жаңа дәуірге аяқ басқан кезде", - деді саясаткер.