Қаңтар айының зейнетақысы жаңа жылға дейін аударылатыны рас па: министрлік жауап берді

Министрліктің мәліметінше, мессенджерлер мен әлеуметтік желілерде 2026 жылғы қаңтардың зейнетақы төлемдері 2025 жылғы 30 желтоқсанға дейінгі кезеңде, өсімді ескере отырып, мерзімінен бұрын аударылатыны туралы таралып жатқан ақпарат шындыққа жанаспайды.

"Зейнетақы мен жәрдемақыларды төлеу бекітілген кестеге сәйкес жүргізілетінін хабарлаймыз. Индексацияны ескере отырып, қаңтар айының зейнетақы төлемдері алушыларға 2026 жылдың қаңтар айында аударылады. Желтоқсан айының зейнетақы төлемдері толық көлемде жүргізілді.

Азаматтардан жеке деректердің таралып кетуін болдырмау үшін осыған ұқсас хабарламалармен бірге келетін күмәнді сілтемелерге өтпеуді сұраймыз", - делінген хабарламада.

Министрлік мемлекеттік қолдау шаралары туралы ресми ақпарат тек 1414 нөмірінен SMS-хабарламалар арқылы, сондай-ақ мемлекеттік органдардың ресми интернет-ресурстары арқылы таратылатынын еске салды.

Сондай-ақ азаматтардан тек ресми көздердегі ақпаратқа сенуге, жалған ақпарат үшін жауапкершілік қарастырылғанын еске салды.