Астанада тұрақты даму мақсаттарының жүзеге асырылуына арналған іс-шара өтті

Шараға мемлекеттік ұйымдар, үкіметтік емес сектор, сарапшылар, жас көшбасшылар және қала тұрғындары қатысты. ТДМ бағытындағы бастамалардың нәтижесін бағалау, жаңа идеяларды ортаға салу және қаладағы әлеуметтік мәселелерді шешуге арналған тың жобаларды талқылау — жиынның негізгі мақсаты болды.

Воркшоппен басталған мазмұнды күн

Таңғы 9:00-де кофе-брейкпен басталған шара қатысушылардың еркін форматта танысуына мүмкіндік берді.

Одан кейін Тұрақты даму мақсаттарының қағидаларын қолдану бойынша воркшоп өтті. Сарапшылар мен модераторлар қатысушыларға халықаралық тәжірибелерден мысалдар келтіріп, ТДМ-ды жергілікті деңгейде енгізудің тиімді тетіктерін түсіндірді.

Практикалық сессияда қатысушылар топтарға бөлініп, ТДМ принциптерін қала инфрақұрылымына, әлеуметтік саясатқа, экология және инклюзивті даму салаларына бейімдеу бойынша ұсыныстар әзірледі. Әр топ өз жобаларын қорғап, нақты нәтижеге бағытталған шешімдерді ортаға салды.

Қоғамдық талқылау жаңа идеяларға жол ашты

Күннің ең белсенді бөлігі қоғамдық талқылау болды. Қатысушылар қаладағы өзекті әлеуметтік проблемаларды атады және оларды шешуге бағытталған жаңа жобалар мен идеялар ұсынды. Талқылауда экологиялық бастамалар, балалар мен жастарға арналған әлеуметтік бағдарламалар, қалалық ортадағы қауіпсіздік, қолжетімді инфрақұрылым, сондай-ақ цифрлық шешімдер тақырыптары көтерілді. Жиын жобаның қорытындысымен түйінделді

Шарада «Астана қаласында ТДМ-ға қол жеткізу және жүзеге асыру» жобасының нәтижелері таныстырылды. Сарапшылар қалада іске асырылып жатқан бастамалар туралы есеп беріп, алдағы жылдарға арналған жоспарларымен бөлісті.

Қатысушылар жобаның қала үшін маңызы зор екенін атап өтіп, тұрақты дамудың тек мемлекеттік органдар үшін ғана емес, қоғамның барлық мүшесі үшін ортақ міндет екенін жеткізді.

Ұйымдастырушылардың айтуынша, бұл іс-шаралар сериясы Астананың Тұрақты даму мақсаттарын жүзеге асырудағы жаңа кезеңнің бастамасы болып табылады.