Астана
19°C
Астана
19°C
Қазақстанда «Green Steppe» жобасы аясында және Мәдениет және ақпарат министрлігінің қолдауымен ұйымдастырылған «Мейірімді тазару» республикалық экологиялық-әлеуметтік акциясы елдің бірнеше өңірін қамтыды. Бастаманы «Ұлттық волонтерлер желісі» бірлестігі жүзеге асырып, оған 200-ден астам ерікті, жастар ресурстық орталықтарының қызметкерлері және үкіметтік емес ұйым өкілдері қатысты, деп хабарлайды Paryz.kz.
Акцияның негізгі мақсаты – қоғамда өзара көмек мәдениетін дамыту, экологиялық жауапкершілікті арттыру және азаматтарды әлеуметтік маңызды жұмыстарға тарту. Іс-шара аясында Шымкент қаласымен қатар Ақтөбе, Шығыс Қазақстан, Солтүстік Қазақстан, Қарағанды және Түркістан облыстарында бірқатар жергілікті акциялар ұйымдастырылды.
Волонтерлер қарттар мен ардагерлерге көмек көрсетіп, аула аумақтарын қар мен мұздан тазарту жұмыстарына қатысты. Сонымен бірге елді мекендерде су тасқынының алдын алуға бағытталған абаттандыру және қауіпсіздік шаралары да жүргізілді.
Ресми мәліметтерге сәйкес, Қазақстанда волонтерлік қызметті дамыту мемлекеттік саясаттың маңызды бағыттарының бірі болып саналады. Ел аумағында мыңдаған еріктіні біріктіретін волонтерлік ұйымдар жұмыс істейді, ал «Birgemiz» сияқты ұлттық жобалар әлеуметтік және экологиялық бастамаларды жүйелі түрде қолдап келеді.
Мәдениет және ақпарат министрлігі өкілдері атап өткендей, мұндай акциялар жастардың азаматтық белсенділігін арттырып қана қоймай, қоғамдағы әлеуметтік жауапкершілікті күшейтуге ықпал етеді. Сонымен қатар волонтерлік қозғалыс төтенше жағдайлардың алдын алу және әлеуметтік әлсіз топтарға қолдау көрсету ісінде маңызды ресурс ретінде қарастырылып отыр.
