«Басты күдікті анықталды»: Германияда қаза тапқан қазақстандық судьяның өлімі туралы тың мәлімет шықты

Министрлік өкілі Айбек Смадияровтың мәліметінше, қаза тапқан әйелдің енесі Наталья Донцова күдікті деп танылған.

«Дармштадт қаласының сотының шешімімен Наталья Донцова кісі өлтіру ісі бойынша айыпталушы деп танылды. Германия полициясы оны Еуропа бойынша іздеуге ордер берді. Қазіргі таңда Донцованың қайда екені белгісіз. Ол халықаралық іздеуде», — деді Смадияров. 

СІМ өкілі бұл істің «саяси астары жоқ, бұл — қарапайым тұрмыстық жағдай, қылмыстық оқиға» екенін атап өтті.

Осындай жауапты бұған дейін Сыртқы істер министрі Мұрат Нұртілеу де берген болатын. Марқұмға қатысты сұрақтар министрдің наразылығын тудырған.

Қазақстандық, бұрынғы судья Айгүл Сайлыбаеваның қатыгездікпен өлтірілуі Германияда бір жыл бұрын болған.

Оның денесі көптеген пышақ жарақаттарымен полиэтилен қаптың ішінен табылып, Эрлаче көлі маңындағы кәріз құбырына (карьерге) тасталған.

Қайтыс болған кезде әйел 24-апталық жүкті болғаны сот-медициналық сараптама кезінде анықталған. Осы уақытқа дейін тергеу ісі нәтиже бермей, марқұмның туыстары бұл қылмыстың артында кім тұрғанын біле алмай отыр.