Елорда жастары экологиялық сенбілікке белсенді қатысты

Экологиялық бастама аясында 100-ге жуық студент Ш.Құдайбердіұлы даңғылы мен А.Пушкин көшесінің қиылысындағы гүлзар аумағына жиналып, тазалық жұмыстарын жүргізді. Қатысушылар аумақты қоқыстан тазартып, былтырғы жапырақтарды жинап, жаяу жүргіншілер жолы мен жасыл желектерді ретке келтірді.

Ұйымдастырушылардың айтуынша, мұндай сенбіліктер қаланы абаттандырумен қатар жастардың экологиялық мәдениетін қалыптастыруға бағытталған. Байқоңыр ауданы әкімдігі бұл шаралардың бір реттік акция емес, жүйелі түрде жалғасатынын атап өтті.

Мамандардың сөзінше, «Таза Қазақстан» бастамасының негізгі мақсаты – тұрғындардың тазалыққа, қоғамдық тәртіпке және қоршаған ортаға деген жауапкершілігін арттыру. Осыған байланысты мамыр айының соңына дейін қала бойынша сенбіліктер мен абаттандыру жұмыстары жалғасады.

Студенттер де мұндай бастамалардың маңызын ерекше атап өтті. Олардың пікірінше, сенбілік тек тазалық жұмысы ғана емес, ортақ іске үлес қосу, бірлік пен жауапкершілік мәдениетін қалыптастырудың тиімді жолы.

Нәтижесінде гүлзар аумағы толық тазартылып, қатысушылар арасында қоршаған ортаға ұқыпты қарау мен қоғамдық белсенділік құндылықтары нығая түсті.