Зейнетақы жинағын ерте шешіп алу тоқтатылуы мүмкін бе

Бүгін Парламент Мәжілісінде тілшілер министрден БЖЗҚ-дан алынған зейнетақы қаражатына қатысты сауал қойды.

«Бірыңғай жинақтаушы зейнетақы қорындағы шекті мөлшерден артық қаражатты шешіп алуға тыйым салынуы мүмкін бе? Әлде, шекті мөлшердің деңгейі едәуір өсе ме?», — деп сұрады тілшілер.

Өз кезегінде Светлана Жақыпова биылғы Жолдауда Мемлекет басшысы Үкімет Ұлттық банкпен, сондай-ақ Стратегиялық жоспарлау және реформалар агенттігімен бірлесе отырып зейнетақы жүйесінің қаржылық тұрақтылығын нығайтуға қатысты тапсырма бергенін еске салды. 

— Осы орайда министрлік алаңында сарапшылар тобы құрылды. Оның құрамында Ұлттық банк пен агенттік төрағаларының орынбасарлары, еліміздегі білікті сарапшылар енді. Талқылау барысында тиісті қадамдарды пысықтаймыз. Сондықтан қазір БЖЗҚ-дан жинақты ерте шешіп алу тақырыбына, сондай-ақ тұжырымдамалық деректерге қатысты айту ерте. Себебі, осының бәрі сарапшалар тобында қаралады, — деді министр.