Ақтаудағы ұшақ апаты: министр тергеу қай сатыда тұрғанын айтты

Министрдің айтуынша, кез келген тергеу бірнеше кезеңге бөлінеді.

"Бірінші кезеңде материалдар жиналады, ол аяқталды. Қазір екінші кезең - жинақталған материалдарды зерделеу жүріп жатыр. Қазір біз зерттеу сатысындамыз. Зерттеу аясында біздің мамандар шақырылған шетелдік сарапшылармен және ИКАО-мен бірге Баку, Грозный, сондай-ақ Ростов-на-Дону қалаларында болды. Қазір сіздерге айтарым тек осы", - деді Қарабаев. Министр зерттеуге қажетті материалдар Қазақстанда екенін хабарлады. 

Еске салайық, 2024 жылдың 25 желтоқсанында таңертең Azerbaijan Airlines (AZAL) әуе компаниясының Embraer 190 ұшағы Қазақстанның батысындағы Ақтау қаласының маңында апатқа ұшырады.

Ұшақ Бакуден Грозныйға ұшып бара жатқан. Әуе компаниясының мәліметінше, бортта 62 жолаушы мен бес экипаж мүшесі болған.

Төтенше жағдайлар министрлігінің мәліметінше, 29 адам аман қалған. Ресей елшілігінің мәліметінше, олардың арасында тоғыз ресейлік бар. Жалпы, тізім бойынша ұшақ бортында 16 Ресей азаматы болған.